Түркістан қаласында мүмкіндігі шектеулі жандарға арналып салынған тұрғын-үй пайдалануға берілді. Екі қабатты, 16 пәтерлік ғимаратта жарымжан жандарға толығымен жағдай жасалған. Қолайлы болу үшін баспалдақтарда арнайы пандустар қарастырылған. Жуыну бөлмелері мүмкіндігі шектеулі жандарға ыңғайлы етіп жабдықталған. Бірінші мөлтек ауданнан бой көтерген ғимаратты «Отау құрылыс» компаниясы бизнестің әлеуметтік жауапкершілігі аясында тұрғызып отыр. Қоныс тойын тойлау барысында қала әкімі Қ. Молдасейтов, қалалық мәслихат хатшысы Ғ. Рысбек, Қ.А.Ясауи атындағы ХҚТУ президенті Л. Тәшімов, қалалық ақсақалдар алқасының төрағасы Ж. Әзіретбергенұлы сөз сөйлеп, үлкен істің атқарылғанын атап өтті.

Түркістанның киелі топырағы қазақ спортының тарихына үш бірдей саңлақты алып келді. Олар «қазақ волейболының ізашары» атанған Октябрь Жарылқапов, бокс майталманы Әбідсалан Нұрмаханов және күні кешегі жасындай жарқ еткен асық ұл Бекзат Саттарханов еді.

Өткен аптада Түркістан қаласында дүркіреген той өтті. Яғни, аптаның сенбісінде түркістантандықтар қала күні және «Алтын күз» мерекесін қатар тойлады. Қала күніне орай Б. Саттарханов атындағы спорт кешенінің алдынан қазақ боксының хас шебері Ә. Нұрахановтың ескерткіші ашылды. Салтанатты шара барысында бокс майталманының жұбайы, бауырлары, шәкірттері сөз сөйлеп, батырын құрметтеген басшылар мен Түркістан қаласының тұрғындарына ризашылықтарын білдіріп, алғыстарын айтты.

Мемлекет басшысы Нұрсұлтан Әбішұлы Назарбаев: «Балалар – еліміздің бүгіні мен ертеңі. Мемлекетіміздің басты байлығы, әрі тірегі. Кішкентай бүлдіршіндеріміздің алғашқы даму кезеңі, білім мен тәрбие берудің алғашқы сатысы – балабақша» деген болатын. Осы мақсатта түркістандықтар «Балапан» бағдарламасы аясында республикалық бюджет есебінен жалпы көлемі 1160 орындық 4 балабақша салып, соның үшеуі білім күнінде пайдалануға берілді. Сонымен бірге жергілікті деңгейде «Балапан» бағдарламасын іске асыру мақсатында жергілікті бюджет есебінен биыл 5 балабақша іске қосылмақ.